Humahangos
sa ilalim ng talulot
ng napikit niyang mga mata
umiikot ang kanyang paningin
tila naghahanap sa dilim
ng daan palabas
ng bangungot
na sumukob sa mundong
itinago ng tulog
nais tumakas sa
halakhak ng humahabol
na halimaw.
di man mahimbing
di rin magising
ang aking mahal.
di maimulat ang mga mata.
maya maya pa’y bumuka ang bibig
bahagya
at muling itinikom
wari’y sikretong muntik nang maka-alpas.
nais kitang sundan
mahal ko
hanapin ka sa karimlan
dala ko ay
kandilang di naagnas at
apoy ng dakilang tapang.
handa na akong lumusong
sa kumunoy ng iyong katinuan
kundangan lang sa iyong
pagbalik.
humahangos
buti-butil ang pawis
at walang pagkilalang nabanaag
nang ako’y iyong tignan.
sa susunod mahal
mauuna na ako
sa lugar na iyong kinatatakutan
at doon maghihintay
nang ni isang saglit
di mawalay ang ating malay.
kay lungkot mag-isa.
